Sunderland skrefi nær ensku úrvalsdeildinni

Sunderland hafði betur gegn Luton, 2:1, á heimavelli í fyrri leik liðanna í undanúrslitum umspils ensku B-deildarinnar í fótbolta.

Elijah Adebayo kom Luton yfir á 11. mínútu en Amad Diallo, lánsmaður frá Manchester United, jafnaði á 39. mínútu. Trai Hume gerði sigurmarkið á 63. mínútu.

Sigurliðið í einvíginu mætir annað hvort Coventry eða Middlesbrough í úrslitaleik um sæti í ensku úrvalsdeildinni á Wembley en þau leika fyrri leik sinn á morgun.

Í undanúrslitum umspils um sæti í B-deildinni gerðu Bolton og Barnsley jafntefli, 1:1, í fyrri leik sínum í Bolton. Jón Daði Böðvarsson hefur ekki leikið með Bolton síðan í janúar vegna meiðsla. Peterborough vann stórsigur á Sheffield Wednesday, 4:0, í hinu einvíginu í gær.

Í undanúrslitum umspils um sæti í C-deildinni vann Salford City heimasigur á Stockport, 1:0, í fyrri leik liðanna. Carlisle og Bradford City mætast í hinu einvíginu á morgun.

• Blogga um frétt