Mín besta frammistaða fyrir Liverpool

Curtis Jones, miðjumaður Liverpool, var að vonum hæstánægður eftir að hann skoraði tvö mörk í 3:0-sigri á Leicester City í ensku úrvalsdeildinni í knattspyrnu í gærkvöldi.

Jones var tekinn tali af Sky Sports eftir leikinn þar sem hann var spurður hvort um bestu frammistöðu sína fyrir Liverpool á ferlinum hafi verið að ræða.

„Ég held það já, algjörlega. Þetta var leikur þar sem ég var mikið með boltann og skoraði auk þess tvö mörk,“ svaraði Englendingurinn.

Frétt af mbl.is

Stoðsendingaþrenna og glæsileg mörk (myndskeið)

Á fyrri hluta tímabilsins var hann lengi frá vegna meiðsla og átti svo erfitt með að koma sér inn í liðið. Undanfarið hefur hann hins vegar fengið tækifæri í byrjunarliði Liverpool og staðið sig afar vel er liðið hefur unnið sjö deildarleiki í röð.

„Ég var frá í 15 vikur og átti erfitt en nú er ég kominn til baka og er í byrjunarliðinu, skorandi mörk og hjálpandi liðinu. Ég reyni bara að halda áfram.

Við erum mikið að æfa skot á æfingum. Ég er að spila og aðlagast liðinu vel. Maður fær fleiri færi með því að koma sér í grennd við vítateiginn þannig að það er það sem ég er að gera.

Daginn fyrir leik erum við alltaf með skotkeppni á æfingum,“ bætti Jones við.

• Blogga um frétt