Íhuga að lána Greenwood utan Englands

Enska knattspyrnufélagið Manchester United íhugar nú að lána Mason Greenwood út fyrir landsteinana á næsta tímabili.

Greenwood, sem er 21 árs sóknarmaður, hefur ekki spilað fyrir Man. United síðan hann var handtekinn í janúar á síðasta ári, grunaður um tilraun til nauðgunar, líkamsárás og þvingandi hegðun gagnvart kærustu sinni.

Fyrir nokkrum mánuðum var málið látið niður falla en Greenwood er enn í banni hjá félaginu á meðan það framkvæmir eigin rannsókn á málinu.

Daily Mail greinir frá því að United hafi nú í hyggju að lána sóknarmanninn utan Englands, þar sem Ítalía, Spánn og Tyrkland eru þrír líklegustu áfangastaðirnir.

Greenwood á enn tvö ár eftir af samningi sínum hjá Man. United og nú þegar tímabili liðsins er lokið má vænta þess að niðurstaða úr rannsókn félagsins fáist fljótlega.

• Blogga um frétt