Ekki aftur í leikmannahóp United?

Enskir miðlar greina frá því í dag að forráðamenn enska úrvalsdeildarfélagsins í fótbolta, Manchester United, íhugi að hætta við að setja Mason Greenwood aftur í leikmannahóp liðsins.

Richard Arnold, framkvæmdastjóri félagsins, hafði ákveðið að tilkynna endurkomu Greenwood en þær fregnir láku út og vöktu mismikla ánægju meðal stuðningsmanna félagsins.

Erik ten Hag, knatt­spyrn­u­stjóri Manchester United, og John Murtough, yf­ir­maður knatt­spyrnu­mála, eru á meðal þeirra sem vilja Greenwood aft­ur í leik­manna­hópinn.

Frétt af mbl.is

Ten Hag vill Greenwood aftur í hópinn

Sjónvarpskona og kvennalið ósátt

Greenwood var hand­tek­inn í janú­ar á síðasta ári og var síðar ákærður fyr­ir til­raun til nauðgun­ar og lík­ams­árás í garð kær­ustu sinn­ar, Harriet Rob­son. Hann hefur ekki spilað fyr­ir upp­eld­is­fé­lag sitt síðan þá.

Málið var látið niður falla þegar lyk­il­vitni hætti við að bera vitni.

Sjónvarpskonan Rachel Riley sagðist myndu hætta að styðja Manchester United ef af endurkomu Greenwood yrði og þá eru leikmenn kvennaliðs félagsins sagðir mjög ósáttir við áform félagsins.

Félagið hefur ekki viljað tjá sig um málið og er sagt hvorki vilja ræða það á leikdegi né í aðdraganda úrslitaleiks Englands og Spánar á HM kvenna sem fram fer í Sidney í Ástralíu á morgun.

Heimsækir Tottenham

Manchester United heimsækir Tottenham í 2. umferð ensku úrvalsdeildarinnar í dag. United er með þrjú stig eftir sigur gegn Wolves í fyrstu umferð en Tottenham með eitt stig eftir að hafa gert jafntefli við Brentford.

Leikur Tottenham og Manchester United á Tottenham Hotspur-leikvanginum hefst klukkan 16:30 í dag og verður í beinni textalýsingu á mbl.is.

• Blogga um frétt