Auðkýfingurinn Sir Jim Ratcliffe hefur sent inn tilboð til eigenda Manchester United, Glazer-fjölskyldunnar, um að kaupa fjórðungshlut í enska knattspyrnufélaginu.
Glazer-fjölskyldan neitaði á dögunum 3,5 milljarða dollara tilboði Sjeiksins Jassim bin Hamad Al-Thani sem vildi kaupa alla hluti í félaginu. Hann lofaði einnig að fjárfesta öðrum 1,5 milljörðum dollara í uppbyggingu á leikvanginum, æfingasvæði og í liðinu.
Sir Jim Ratcliffe hefur boðið Glazer-fjölskyldunni 1,8 milljarða dollara fyrir fjórðungshlutinn en hann hefur verið stuðningsmaður liðsins síðan hann var ungur. Hann vildi upphaflega kaupa Glazer-fjölskylduna út úr félaginu en hefur nú sætt sig við að þau ætla ekki að yfirgefa Manchester-borg strax og vill hann því eignast 25% sem og vera með stjórn yfir fótboltadeild félagsins.
Sir Jim Ratcliffe stofnaði efnafyrirtækið INEOS árið 1998 og er nú annar ríkasti maður Bretlandseyja.