Everton áfrýjar stigafrádrættinum

Enska knattspyrnufélagið Everton hefur áfrýjað úrskurði óháðrar nefndar ensku úrvalsdeildarinnar um að draga tíu stig af karlaliðinu, sem leikur í úrvalsdeildinni.

Þetta kemur fram í yfirlýsingu frá Everton.

Þar segir að formanni dómsnefndar ensku úrvalsdeildarinnar hafi verið tilkynnt um áfrýjun Everton og að nú verði áfrýjunarnefnd skipuð til að fjalla um málið.

Samkvæmt niðurstöðum rannsóknar á vegum ensku úrvalsdeildarinnar þótti sýnt fram á að Everton hafi brotið gegn reglum deildarinnar um hagnað og sjálfbærni í rekstri.

Deildin mælti með 12 stiga frádrætti en óháða nefndin úrskurðaði að tíu stig væru nóg, sem er mesti stigafrádráttur liðs í rúmlega þriggja áratuga sögu ensku úrvalsdeildarinnar.

• Blogga um frétt