Leikmaður United þurfti í aðra aðgerð

Hollenski knattspyrnumaðurinn Tyrell Malacia, vinstri bakvörður Manchester United, þurfti að gangast undir aðra aðgerð á hné á dögunum eftir að bakslag kom í endurhæfingu hans.

Malacia meiddist í sumar og gekkst þá undir aðgerð á hné. Hefur hann ekkert spilað með Man. United á tímabilinu vegna meiðslanna.

Samkvæmt yfirlýsingu frá félaginu kom bakslag í bata Malacia, þó ekki sé tekið fram hvers háttar bakslag, og því þurfti hann að gangast undir aðra aðgerð á sama hné.

Í yfirlýsingunni segir að hún hafi heppnast vel og Malacia muni halda áfram endurhæfingu sinni hjá félaginu í þeirri von að snúa aftur á völlinn snemma á næsta ári.

• Blogga um frétt