Hafði ekki hugmynd um hver samherji sinn væri

Enski knattspyrnumaðurinn James Maddison, sóknartengiliður Tottenham Hotspur, viðurkennir að hafa aldrei heyrt um tilvonandi samherja sinn hjá liðinu áður en sá var keyptur í sumar.

Ítalski markvörðurinn Guglielmo Vicario var keyptur frá Empoli í sumar, líkt og Maddison frá Leicester City.

Vicario hafði staðið sig vel með liðinu í ítölsku A-deildinni í tvö tímabil á undan en var þrátt fyrir það ekki mjög þekkt nafn.

„Ég var sjálfur ekki búinn að skrifa undir. Ég spurði: „Hver er þetta?“ Ég hafði aldrei heyrt um hann.

Ég var í baksætinu í bíl að skoða hápunkta hans á YouTube, til þess að ganga úr skugga um hvort hann gæti eitthvað,“ sagði Maddison í samtali við Amazon Prime Sport.

Spurður hvort honum hafi litist á það sem Vicario sýndi á YouTube sagði Maddison:

„Satt að segja leit þetta vel út hjá honum, magnaður í að verja skot. Ég myndi segja að það sé hans helsti styrkleiki, það er erfitt að skora hjá honum.

Stundum æfum við vítaspyrnur og skot á æfingum. Þá vil ég hafa hann í marki því það er erfiðast að skora hjá honum.“

• Blogga um frétt