Ungstirni Liverpool undir hnífinn

Ben Doak, ungur knattspyrnumaður hjá Liverpool, þarf að gangast undir skurðaðgerð vegna meiðsla á hné.

Þessu greindi Pepijn Lijnders, aðstoðarþjálfari Liverpool, frá á fréttamannafundi í gær.

Doak er aðeins 18 ára gamall en hefur þegar spilað tíu leiki fyrir Liverpool í öllum keppnum, fimm á síðasta tímabili og fimm á yfirstandandi tímabili.

„Þetta er ekki gott. Hann reif liðþófa og þarf á aðgerð að halda. Hann verður frá í einhvern tíma. Hann er ungur strákur í góðu formi.

Hann er jákvæður strákur og mun því pottþétt koma sterkari til baka. Við þurfum á því að halda að hann snúi aftur af sama krafti og hann hefur sýnt með boltann. Hann getur tekið sér sinn tíma og við munum bíða eftir honum,“ sagði Lijnders.

• Blogga um frétt