Arsenal vermir toppsætið yfir jólin

Arsenal siglir inn í jólin á toppi ensku úrvalsdeildarinnar eftir jafntefli í toppslag gegn Liverpool á Anfield. Lokatölur 1:1.

Gestirnir hófu leikinn af miklum krafti. Fyrsta marktilraunin var þeirra sem og fyrsta tilraunin á markið.

Það var svo strax á 4. mínútu sem fyrsta markið leit dagsins ljós. Aukaspyrna utan af velli frá Martin Ødegaard rataði beint á kollinn á Gabriel Magalhães sem reif sig frá Ibrahima Konaté og stýrði boltanum fram hjá Alisson í marki Liverpool.

Gabriel Magalhães skorar gott mark og kemur Arsenal yfir. AFP

Liverpool vaknaði við þá blautu tusku sem mark Arsenal var og náði yfirhöndinni úti á vellinum. Þegar um 20 mínútur voru liðnar af leiknum höfðu heimamenn verið um 60% með boltann án þess þó að skapa sér afgerandi færi.

Liverpool gerði tilkall til vítaspyrnu og bæði lið fengu ágætis sénsa til að bæta við mörkum í fyrri hálfleiknum en ekkert vildi undan láta þar til Mohamed Salah fékk tíma í teignum á 29. mínútu. Hann fékk að fara á sinn frábæra vinstri fót og þá var ekki að spyrja að því. Egyptinn smellti boltanum upp í nærhornið alveg út við stöng og Raya réð ekki við skotið.

Mohamed Salah fagnar fyrsta marki sínu og Liverpool í dag. AFP

Seinni hálfleikur einkenndist af miklum hraða framan af án þess að liðunum tækist að skapa sér afgerandi færi.

Skyndilega komust Liverpool-menn fimm gegn tveimur varnarmönnum Arsenal í hraðri sókn sem endaði með því að Salah lagði boltann á Trent Alexander-Arnold. Englendingurinn var óheppinn með skopp á boltanum og náði ekki að halda honum niðri og hann small í þverslánni.

Að lokum sættust liðin á skiptan hlut í frábærum toppslag.

Mbl.is fylgdist með og færði ykkur það helsta í beinni textalýsingu.

Liverpool	1:1	Arsenal	Opna lýsingu Loka
90. mín. Ben White (Arsenal) fær gult spjald Stöðvar boltann með höndinni úti á miðjum velli.
Augnablik — sæki gögn...

• Blogga um frétt