Liverpool vann ótrúlegan sigur á Nottingham Forest, 1:0, í ensku úrvalsdeild karla í knattspyrnu á City Ground í Nottingham í dag.
Eftir leikinn er Liverpool í efsta sæti deildarinnar með 63 stig og er nú fjórum stigum á undan Manchester City sem er í öðru sæti og á leik til góða. Nottingham Forest er í 17. sæti með 24 stig, fjórum stigum fyrir ofan fallsæti.
Sigurmarkið skoraði Darwin Núnez á níundu mínútu uppbótartímans. Þá stangaði hann fyrirgjöf Alexis Mac Allister í netið og tryggði Liverpool sigurinn.
Fátt var um fína drætti í fyrri hálfleik en í þeim síðari fóru liðin að ógna meira. Liverpool hélt mestmegnis boltanum en Forest-menn áttu hættulegar skyndisóknir.
Sigurinn gæti reynst afar dýrmætur en Liverpool verður í toppsæti ensku úrvalsdeildarinnar þegar liðið fær Manchester City í heimsókn þarnæsta sunnudag.