Frá og með næsta tímabili munu leikir sem lykta með jafntefli ekki verða endurteknir í ensku bikarkeppninni í knattspyrnu karla.
Enska knattspyrnusambandið og enska úrvalsdeildin hafa undirritað nýtt sex ára samkomulag þar sem ákveðið var að frá og með fyrstu umferð tímabilið 2024-25 verði jafnteflisleikir ekki endurteknir.
Þess í stað verður gripið til framlengingar og vítaspyrnukeppni til þess að knýja fram sigurvegara standi leikar jafnir að venjulegum leiktíma loknum.
Á yfirstandandi tímabili var endurtekningu leikja hætt frá og með fimmtu umferð.
Í tilkynningu frá enska sambandinu segir að ákvörðunin hafi verið tekin með tilliti til aukins leikjaálags sem stafi af stækkun Knattspyrnusambands Evrópu, UEFA, á keppnum sínum sem leiði til fleiri leikja.
Enska úrvalsdeildin hefur þá tekið ákvörðun um að leggja vetrarfrí á miðju tímabili af.