Enska knattspyrnusambandið vill banna Brasilíumanninum Lucas Paquetá, miðjumanni West Ham, að spila atvinnumannafótbolta í landinu ævilangt fyrir brot á veðmálareglum sambandsins.
Paquetá er gefið að sök að hafa reynt að hafa áhrif á framvindu eða atvik í tilteknum leikjum með því að leitast eftir því að fá viljandi gult spjald frá dómaranum með þeim óviðeigandi hætti að hafa áhrif á veðmálamarkaðinn, með það fyrir augum að einn eða fleiri aðilar gætu hagnast á veðmálum.
Sambandið hefur undanfarna tíu mánuði haft til rannsóknar fjögur grunsamleg gul spjöld sem brasilíski landsliðsmaðurinn fékk í leikjum með West Ham.
Paquetá neitar sök.
Fyrst greindu enskir miðlar frá því að Lucas Paquetá gæti fengið tíu ára bann frá fótbolta en fordæmi hafa verið fyrir því.
Kynan Isaac hjá Stratford United fékk tíu ára bann fyrir að veðja á að hann sjálfur fengi gult spjald.
Hins vegar greinir The Sun frá því að enska knattspyrnusambandinu finnist brot Paquetá vera alvarlegra.
Samkvæmt miðlinum veðjuðu sextíu manns á að Paquetá myndi fá gult spjald í einum eða öllum fjórum leikjunum. Voru upphæðirnar á bilinu 7 til 400 pund. Alls græddi fólkið yfir 100 þúsund pund.
Öll veðmálin fóru fram á lítilli eyju rétt fyrir utan borgina Ríó í Brasilíu.
Búist er við að málið taki langan tíma.