Liðið hans Stefáns minnti Liverpool á tapið

Enska knattspyrnufélagið Preston North End, sem Stefán Teitur Þórðarson leikur með, minnti á að Liverpool fór ekki taplaust í gegnum undirbúningstímabilið.

Liverpool er í æfingarferð í Bandaríkjunum og hefur unnið þrjá leiki í röð. Fyrst, 1:0, gegn Real Betis svo, 2:1, gegn Arsenal og síðast, 3:0, gegn Manchester United.

Áður en liðið fór út mætti Liverpool Preston sem er í B-deild á Englandi en leikurinn var ekki opinn fyrir áhorfendur og Preston vann leikinn, 1:0. 

Robbie Brady skoraði sigurmarkið og Preston minnti á það á samfélagsmiðlum þegar miðilinn TNT Sports talaði um þrjá leiki og þrjá sigra á undirbúningstímabili Liverpool á samfélagsmiðlinum X.

Stefán gekk til liðs við Preston í sumar og félagið staðfesti í dag að hann fær treyju númer 22 á þessu tímabili.

• Blogga um frétt