Englandsmeistarar Manchester City fara vel af stað í ensku úrvalsdeildinni í fótbolta en liðið gerði góða ferð til Lundúna og sigraði Chelsea á útivelli, 2:0, í 1. umferðinni í dag.
Norski markahrókurinn Erling Haaland gerði fyrra markið á 18. mínútu er hann lagði boltann í netið af stuttu færi eftir sendingu frá Bernardo Silva.
City-menn voru líklegri til að bæta við en Chelsea að jafna það sem eftir lifði fyrri hálfleiks en fleiri urðu mörkin ekki fyrir hlé.
Nicolas Jackson fékk flott færi til að jafna á 61. mínútu en hann skaut beint á Ederson af stuttu færi. Reyndi annars lítið á brasilíska markvörðinn í leiknum.
Króatinn Mateo Kovacic innsiglaði síðan sigur City-manna á 84. mínútu. Hann fékk þá boltann á miðjum vallarhelmingi City, tók á rás fram völlinn og skoraði með innanfótarskoti utan teigs og þar við sat.