Hvar annars staðar er þetta eðlilegt?

Neal Maupay, sóknarmaður Everton, var ekki sáttur við framkomu stuðningsmanna félagsins eftir að liðið tapaði 4:0 fyrir Tottenham Hotspur í ensku úrvalsdeildinni í knattspyrnu um helgina.

Á samfélagsmiðlinum X fór í dreifingu myndskeið þar sem stuðningsmenn sitja fyrir leikmönnum Everton og láta þá heyra það.

Maupay brást við myndskeiðinu og skrifaði á X-aðgangi sínum:

„Ímyndið ykkur annað starf þar sem það þykir eðlilegt að verða fyrir svona aðkasti.

Að bíða á lestarstöð til þess að öskra á menn sem eru að reyna sitt besta.“

Í myndskeiðinu sjást stuðningsmenn einnig gefa leikmönnum háar fimmur. Á stuðningsmannaspjallborði Everton hafa margir fordæmt hegðun stuðningsmannanna sem öskruðu á leikmenn.

Maupay var ónotaður varamaður í leiknum á laugardag.

• Blogga um frétt