Íþróttir | Enski boltinn | mbl | 14.9.2024 | 13:28 | Uppfært 16:53

United afgreiddi Southampton í fyrri hálfleik

Matthijs de Ligt fagnar marki sínu í dag. AFP/Glyn Kirk

Manchester United hafði betur gegn Southampton, 3:0, í 4. umferð ensku úrvalsdeildarinnar í Southampton í dag.

Úrslitin þýða að Manchester United situr í áttunda sæti deildarinnar með sex stig en Southampton er í næst neðsta sæti með engin stig.

Viðureignin byrjaði rólega. Manchester United var meira með boltann en Southampton var hættulegri.

Eftir hálftímaleik var Diogo Dalot of seinn í tæklingu á Tyler Dibling, leikmanni Southampton, í teignum og benti Stuart Attwell, dómari leiksins, á punktinn.

Cameron Archer steig á punktinn fyrir Southampton en Andre Onana varði frá honum.

Á 35. mínútu komst Manchester United yfir með marki frá Matthijs de Ligt. Það kom eftir frábæra fyrirgjöf frá Bruno Fernandes á de Ligt sem skallaði boltann í fjærhornið.

Aðeins sex mínútum síðar tvöfaldaði Marcus Rashord forystu Manchester United. Rashford fékk boltann rétt utan teigs og lagði boltann snyrtilega í fjærhornið.

Staðan 2:0 fyrir Manchester United í hálfleik.

Manchester United var töluvert sterkari aðilinn í síðari hálfleik og Southampton-menn ekki líklegir til að minnka muninn.

Á 79. mínútu varð Southampton manni færri þegar Jack Stephens fékk beint rautt spjald eftir tæklingu á Alejandro Garnacho.

Garnacho gerði út um leikinn á sjöttu mínútu uppbótartíma með góðu marki. Dalot lagði boltann út á Garnacho sem skoraði af miklu öryggi.