Enska félagið sektað um 134 milljónir

Enska knattspyrnusambandið hefur sektað Nottingham Forest um 750.000 pund, jafnvirði 134 milljóna íslenskra króna, fyrir ummæli sem félagið birti um VAR-dómarann Stuart Attwell á samfélagsmiðlum sínum í apríl síðastliðnum.

Forest birti harðorða yfirlýsingu eftir 2:0-tap fyrir Everton þar sem heilindi Attwells sem dómara voru dregin í efa og bent á að hann væri stuðningsmaður Luton Town, sem var í harðri botnbaráttu við Forest og Everton á síðasta tímabili.

Forest var ósátt við að fá ekki dæmdar þrjár vítaspyrnur í leiknum og kvaðst hafa beðið um að Attwell yrði skipt út sem VAR-dómara fyrir leikinn en að á beiðni félagsins hafi ekki verið hlustað.

Sjálfstæð nefnd komst að þeirri niðurstöðu að Forest hafi með yfirlýsingu sinni ráðist gegn heilindum dómara og að árásin eigi sér vart samanburð.

• Blogga um frétt