„Þetta eru falsfréttir!“

Nasser Al-Khelaifi, stjórnarformaður París SG í Frakklandi, segir ekkert til í þeim sögusögnum að félagið sé í viðræðum við egypska knattspyrnumanninn Mohamed Salah.

Salah, sem er 32 ára gamall, var sterklega orðaður við Frakklandsmeistarana í gær hjá miðlum á borð við talkSport og L'Equipe í Frakklandi.

Frétt af mbl.is

Salah í viðræðum við stórlið?

Samningur Salah við Liverpool rennur út næsta sumar og er honum því frjálst að semja við annað félag strax eftir áramót en það bendir flest til þess að Egyptinn sé á förum frá Bítlaborginni.

Myndi styrkja öll lið

„Þetta eru falsfréttir!“ sagði Al-Khelaifi í samtali við Sky í Þýskalandi þegar hann var spurður út í mögulega félagaskipti Egyptans.

„Hann er magnaður leikmaður, alveg ótrúlegur, en hann hefur aldrei verið á lista hjá okkur ef ég á að vera alveg hreinskilinn með það.

Það er klárt mál að hann myndi styrkja hvaða lið sem er en orðrómar um að við séum í viðræðum við hann eru falsfréttir,“ bætti Al-Khelaifi við.

• Blogga um frétt