Kraftaverk að hann sé í lagi

Julen Lopetegui, knattspyrnustjóri West Ham United, kveðst furðu lostinn en himinlifandi að sóknarmaðurinn Michail Antonio hafi sloppið eins vel og hann gerði eftir að hafa lent í alvarlegu bílslysi í Essex á Englandi síðastliðinn laugardag.

Antonio fótbrotnaði og gekkst undir skurðaðgerð degi síðar. Er hann lemstraður út um allt enda ná meiðsli jamaíska landsliðsmannsins ekki einungis til fótbrotsins. Verður hann á sjúkrahúsi næstu vikur.

„Við ætlum að heimsækja hann í dag eða á morgun. Aðalatriðið er að við erum ánægð því að bati hans gengur vel. Við eigum í góðu sambandi við hann og fjölskyldu hans og óskum honum alls hins besta næstu daga.

Julen Lopetegui. AFP/Henry Nicholls

Bestu fréttirnar af Michail Antonio voru þær að hann gat talað við okkur fyrir leikinn gegn Wolves [á mánudag] því þegar maður sér myndir af bílslysinu er það kraftaverk að það sé í lagi með hann.

Hann er sterkur og mun láta sér batna á næstu mánuðum, kemur sér í lag sem karlmaður fyrst og svo sem leikmaður,“ sagði Lopetegui á fréttamannafundi í dag.

• Blogga um frétt