Stórsigur Newcastle - Dramatískur sigur Ipswich

Newcastle United valtaði yfir Leicester City, 4:0, í 16. umferð ensku úrvalsdeildarinnar í knattspyrnu í dag.

Jacob Murphy kom Newcastle yfir eftir hálftímaleik. Staðan í hálfleik 1:0, Newcastle í vil.

Bruno Guimares og Alexander Isak skoruðu annað og þriðja mark Newcastle snemma í síðari hálfleik. Murphy innsiglaði síðan sigur Newcastle með sínu öðru marki.

Úrslitin þýða að Newcastle er í 11. sæti með 23 stig. Leicester er í 16. sæti með 14 stig.

Dramatískur sigur í fallbaráttuslagnum

Ipswich vann dramatískan sigur gegn Wolves, 2:1, í fallbaráttuslag á Molineux-vellinum í dag.

Matt Doherty, varnarmaður Wolves, varð fyrir því óláni að skora sjálfsmark og var Ipswich yfir, 1:0, í hálfleik.

Brasilíumaðurinn Matheus Cunha jafnaði metin fyrir Úlfana á 72. mínútu. Jack Taylor skoraði síðan sigurmark Ipswich á fjórðu mínútu í uppbótartíma.

Wolves situr í 19. sæti með níu stig en Ipswich er sæti fyrir ofan með níu stig.

• Blogga um frétt