Jafntefli hjá Tottenham - Forest í annað sætið

Tottenham og Wolves skildu jöfn, 2:2, í 19. umferð ensku úrvalsdeildar karla í fótbolta í dag.

Hwang Hee-Chan kom Wolves yfir á sjöundu mínútu. Rodrigo Bentancur jafnaði metin aðeins fimm mínútum síðar.

Undir lok fyrri hálfleiks fékk Tottenham víti. Heung-Min Son fór á punktinn en José Sá varði frá honum.

Tottenham tók forystuna í uppbótartíma fyrri hálfleiks þegar Walesverjinn Brennan Johnson skoraði.

Norðmaðurinn Jørgen Strand Larsen jafnaði metin fyrir Wolves á 87. mínútu. Lokaniðurstaðan var því 2:2-jafntefli.

Tottenham er í 11. sæti með 24 stig en Wolves er í 17. sæti með 16 stig. 

Forest í annað sætið

Nottingham Forest er komið upp í annað sæti ensku úrvalsdeildarinnar eftir 2:0-sigur gegn Everton í dag.

Chris Wood kom Forest yfir á 15. mínútu og Morgan Gibbs-White innsiglaði sigurinn á 61. mínútu.

Everton situr í 16. sæti með 17 stig.

Fjögurra marka jafntefli í Lundúnum

Fulham og Bournemouth gerðu 2:2-jafntefli í hörkuleik í Lundúnum í dag.

Raul Jiménez skoraði eina mark fyrri hálfleiksins og var staðan 1:0 fyrir Fulham í hálfleik.

Evanilson jafnaði metin snemma í síðari hálfleik. Á 72. mínútu komst Fulham yfir á ný eftir mark frá Harry Wilson.

Dango Ouattara jafnaði fyrir Bournemouth og endaði leikurinn með 2:2-jafntefli.

Að lokum vann Crystal Palace mikilvægan sigur gegn Southampton, 2:1, í Lundúnum í dag.

Nýliðarnir tóku forystuna á 14. mínútu þegar Tyler Dibling skoraði. Trevoh Chalobah jafnaði metin fyrir Palace á 31. mínútu og var jafnt í hálfleik, 1:1.

Eberechi Eze skoraði sigurmark Palace á 52. mínútu. Lokaniðurstaða var 2:1-sigur Palace.

Crystal Palace er með 20 stig í 15. sæti en Southampton er á botninum með sex stig.

• Blogga um frétt