Sagður hafa sparkað í höfuð eiginkonunnar

Fyrrverandi knattspyrnumaðurinn Joey Barton mætti fyrir rétt í Westminster á Englandi í dag. Barton er ákærður fyrir líkamsárás í garð eiginkonu sinnar Georgiu, og er meðal annars gefið að sök að hafa sparkað í höfuð hennar.

Atvikið er sagt hafa átt sér stað á heimili þeirra í Kew í Lundúnum í júní árið 2021. Saksóknari greindi frá málsatvikum fyrir dómstólum í dag.

Þar kom fram að hjónin hafi rifist eftir að hafa setið að sumbli ásamt tveimur öðrum pörum. Joey hafi hótað að slást við bróður og föður Georgiu.

Joey Barton neitar sök

Eftir orðaskak þeirra í milli hafi Joey svo gripið í Georgiu, hrint henni á gólfið og sparkað í höfuð hennar. Vinur þeirra hafi þá reynt að skakka leikinn en Joey fleygt honum af sér og sagt: “Ekki vanvirða mig.”

Georgia hringdi á lögregluna og var símtalið spilað fyrir rétti í Westminster þar sem hún greinir frá því að Joey hafi veitt sér högg í andlitið og að það væri í fyrsta sinn sem hann hafi beitt sig ofbeldi.

Málflutningur í réttarhöldunum heldur áfram næstu daga. Joey Barton hefur neitað sök.

• Blogga um frétt