Kærður fyrir kynþáttaníð af enska sambandinu

Enska knatt­spyrnu­sam­bandið hef­ur kært svart­fellska sókn­ar­mann­inn Milut­in Os­majic, leik­mann Prest­on North End, fyr­ir meint kynþátt­aníð í garð Hanni­bal Mejbri, miðju­mann Burnley.

Mejbri brást ókvæða við og lét dóm­ar­ann Andrew Kitchen vita um leið og Os­majic sagði eitt­hvað við hann, sem Mejbri seg­ir að hafi verið rasísk um­mæli í sinn garð, á meðan leik Prest­on og Burnley stóð í ensku B-deild­inni í síðasta mánuði.

Nokk­urra mín­útna hlé var gert á leikn­um vegna at­viks­ins. Os­majic hef­ur neitað sök en hef­ur til 25. mars til þess að bregðast form­lega við kæru enska sam­bands­ins.

Var ekki með í næsta leik

Liðin mætt­ust aft­ur í ensku bik­ar­keppn­inni tveim­ur vik­um eft­ir leik­inn þar sem Os­majic skoraði eitt mark í 3:0-sigri Prest­on og fagnaði með því að æsa stuðnings­menn Burnley upp.

Scott Par­ker, stjóri Burnley, greindi frá því eft­ir leik að hann hafi ákveðið að velja Mejbri ekki í leik­manna­hóp liðsins til þess að vernda hann. Leik­menn Burnley neituðu að taka í hönd Os­majic fyr­ir bikarleik­inn.

Er þetta í annað sinn á tíma­bil­inu sem Svart­fell­ing­ur­inn lend­ir í vand­ræðum þar sem hann fékk átta leikja bann fyr­ir að bíta Owen Beck, leik­mann Blackburn Rovers, í B-deild­inni í októ­ber síðastliðnum.

• Blogga um frétt