Íþróttir | Rafíþróttir | mbl | 20.8.2021 | 11:10

Nýr þjóðarleikvangur rafíþrótta opnaður bráðlega

Arena er nýr þjóðarleikvangur rafíþrótta sem opnar bráðlega í Turninum við Smáratorg í Kópavogi. Skjáskot/youtube.com/ArenaGaming

Arena, nýr þjóðarleikvangur rafíþrótta sem bráðlega verður opnaðurí Turninum við Smáratorg í Kópavogi, leitast við að bjóða upp á tölvuaðstöðu fyrir alla sem þangað leita.

Hægt verður að finna eitthvað við sitt hæfi hvort sem maður er tölvuleikjaspilari í leit að afdrepi til að spila í rólegheitum í flottri aðstöðu, hópur sem vill spila saman í gömlu góðu sófastemningunni eða árangursmiðaður rafíþróttamaður eða -lið sem lætur einungis bjóða sér það besta.

Svo miklu meira en bara „rafleikjahöll“

„Einfaldasta orðið til að lýsa Arena væri kannski „rafleikjahöll“, en það er samt ekki rétt því þetta er svo miklu meira,“ segir Sigurjón Steinsson, framkvæmdarstjóri Arena.

„Hérna verður ekki einungis þessi hefðbundna útleiga á PC-tölvum til einstaklinga heldur ýmiss konar þjónusta, bæði fyrir einstaklinga og hópa, að ónefndum veitingastaðnum okkar sem bætir öðru lagi ofan á það sem býðst gestum.“

Þóri Viðarssyni (til vinstri), August Demirsson (fyrir miðju) og Donna Cruz (til hægri) voru nýlega ráðin til Arena. Ljósmynd/Aðsend.

Hægt að panta mat og fá hann alla leið í sætið

Samtengdur Arena verður veitingastaðurinn Bytes, þar sem gestum býðst að panta ríkulegar pítsur, samlokur og aðra rétti. Staðurinn verður einnig með vínveitingaleyfi og því hægt að fá drykki með, og aðdáendum rafíþrótta býðst loks aðstaða til að setjast niður á þartilgerðu setusvæði eða „lounge“ til að fylgjast með helstu rafíþróttaútsendingum sem eru í gangi hverju sinni.

„Við vildum geta boðið upp á eitthvað fyrir alla sem heimsækja okkur og vildum líka geta boðið upp á framúrskarandi þjónustu. Þar vaknaði sú hugmynd að bjóða gestum að panta hjá okkur í gegnum snjallsímaforrit og fá veitingar afhentar beint til sín alla leið í sætið. Hvað varðar setusvæðið okkar, þá var það bara eitthvað sem okkur hafði fundist vanta og vildum endilega geta boðið upp á.“

Sófasvæði og PlayStation 5-tölvur

Fyrir utan setusvæðið verður einnig í salnum svæði með sófum þar sem hægt verður að koma sér fyrir og spila á Playstation 5, einn eða með smærri hópum. Ef hóparnir eru stærri verður svo einnig sérstakt VIP-herbergi með stórum sjö metra sófa og þremur 75" sjónvörpum tengdum Playstation 5-tölvum sem hægt verður að leigja út.

„Okkur fannst þessi gamla góða sófastemning, eða „couch co-op“, oft gleymast, þrátt fyrir að vera mikilvægur þáttur af félagslegri tölvuleikjaiðkun. Þess vegna þótti okkur mikilvægt að hafa þessi svæði hjá okkur,“ segir Sigurjón.

Salir með PC-tölvum til útleigu

Önnur herbergi sem verða til útleigu eru fjögur herbergi með fimm PC-tölvum hvert þar sem hópar geta komið saman til að spila í meira næði en býðst í salnum. Hægt er að opna á milli herbergja og því jafnvel hægt að bjóða upp á aðstöðu fyrir allt að 20 manna hópa.

Er þetta eflaust álitlegur kostur fyrir rafíþróttalið sem skortir aðstöðu en vilja fá að æfa saman í eigin persónu. Mun rafíþróttadeild Breiðabliks æfa á þessu svæði á daginn og er því einnig búið að setja upp aðstöðu fyrir líkamlegar æfingar fyrir utan herbergin.

Spara ekki þegar kemur að tölvubúnaði

Í aðalrýminu verða svo 76 tölvur af nýjustu gerð, en Sigurjón segir að ekki hafi verið sparað í þeim málum:

„Við vildum ekki bjóða upp á neitt nema það besta og er því allur búnaður hjá okkur, allt niður í jaðarbúnað, frá Alienware. Allar tölvurnar í aðalrýminu eru Alienware Aurora R10 með AMD Ryzen 7 5800X-örgjörva, 32GB DDR4 vinnsluminni, M.2 PCIe NVMe hörðum diski og Nvidia GeForce RTX 3060 Ti 8GB skjákorti.

Í herbergjunum fórum við svo skrefi lengra og þar eru tölvurnar með AMD Ryzen 9 5900X-örgjörva og Nvidia GeForce RTX 3080 10Gb skjákorti. Allir skjáir eru 240 Hz Alienware 25-skjáir með 1 ms GtG og G-Sync. Svona búnað er ekki auðvelt að fá í dag og viljum við þakka Advania fyrir gífurlega gott samstarf í þeim málum.“

Hægt að fylgjast með upptökuveri þar sem framleiðsla efnis fer fram

Í gegnum glugga í salnum má svo sjá inn í upptökuver, en Arena og Rafíþróttasamtök Íslands hafa tekið höndum saman um að setja upp framleiðslufyrirtæki RÍSÍ sem leggur áherslu á að framleiða rafíþrótta- og tölvuleikjatengt efni á íslensku.

Í þeim tilgangi verða einnig tvö sérstök keppnisherbergi fyrir lið svo allt eigi sér stað á svæðinu.

Arena er nýr þjóðarleikvangur rafíþrótta sem opnar bráðlega í Turninum við Smáratorg í Kópavogi. Ljósmynd/Aðsend

Toppbúnaður í keppnisherbergjum

„Í keppnisherbergjunum verða tölvurnar með Ryzen 9-örgjörvanum, RTX 3080-skjákortinu og svo 360 Hz Alienware 25-skjám. Þau herbergi verða þó ekki í opinni útleigu en fyrir einstaklinga sem vilja það allra besta verðum við með nokkrar tölvur í sérhorni þar sem boðið verður upp á þessar tölvur og þennan skjá,“ segir Sigurjón.