Ný veröld í World of Warcraft

Eftir að hafa lært um uppruna alheimsins og barist við ýmsa Guði eftirlífsins í nýjasta aukapakka World of Warcraft, Shadowlands, eru margir leikmenn farnir að sakna lífsins á „jörðinni“.

Veita innsýn í nýja veröld

Þróunaraðilar World of Warcraft birtu myndband á YouTube þar sem þeir veita áhorfendum innsýn inn í næsta aukapakka ásamt næstu og síðustu uppfærslu Shadowlands. Af því að dæma virðist vera sem leikmenn snúi aftur á jörðina, til Azeroth, í næsta aukapakka.

Í myndbandinu má sjá að leikmenn komist í tæri við nýtt og heilagt land þar sem Shadowlands og Azeroth var skapað og lýsa þróunaraðilar því sem landinu á bakvið tjöldin. Þar sem alheimurinn var skapaður en þar truflar návist Fangavörðsins (e. The Jailor) verkferlið.

Markmiðið í næstu uppfærslu er því að stöðva Fangavörðinn og vernda hið heilaga land.

Skjáskot úr myndbandi þar sem þróunaraðilar sýna frá nýrri uppfærslu World of Warcraft. Skjáskot/YouTube/Blizzard

Allt hefur tilgang

Hið heilaga land, Zereth Mortis, býr að lögmálum sem við þekkjum ekki en þar má sjá svífandi tré og hægt er að labba á vatni. Þróunaraðilar segjast leggja áherslu á að gera landið eins fjarstæðukennt og þeir gátu.

„Allt sem þú sérð í Zereth Mortis hefur sinn tilgang og ásetning,“ segir Gabe Gonzalez, umhverfisstjóri í umræddu myndbandi.

Nægt rými fyrir ný ævintýri

Eins segir frásagnarhönnuðurinn, Steve Danuser, í viðtali við Game Rant að það sé nægt rými til bæði stærri sem smærri og jafnvel persónulegri ævintýra í veröld World of Warcraft.

Nánari upplýsingar má finna í myndbandinu hér að neðan.

• Blogga um frétt