Rekin fyrir óviðeigandi athugasemd

Tanukana, atvinnumaður í Tekken, var rekin úr liðinu Cyclops Athlete Gaming fyrir að gera lítið úr lágvöxnum körlum í beinu streymi þann 15. febrúar.

Nánar tiltekið segir hún að menn undir 170cm hefðu ekki mannréttindi og bætir við að þeir ættu að fara í aðgerð til þess að lengja beinin sín. 

Talin stjarna á uppleið

Cyclops Athlete Gaming keppir í fyrstu persónu skotleikjum á borð við PUBG, Call of Duty og Rainbow Six Siege en einnig í bardagaleikjum eins og Tekken. Tanukana hefur setið í sviðsljósinu í japönskum fjölmiðlum og jafnframt verið talin stjarna á uppleið.

Liðið birti formlega afsökunarbeiðni á heimasíðunni sinni.

„Við höfum staðfest að þann 15. febrúar gerði Tanukana, sem er meðlimur í Cyclops Athlete Gaming, óviðeigandi athugasemd á streymi. Varðandi þetta mál viljum við biðja aðdáendur, styrktaraðila og alla aðra sem styðja okkur innilega afsökunar.“

Með samviskubit

Tanukana birti einnig afsökunarbeiðni á Twitter-aðgangi sínum sem hún beinir að aðdáendum sínum og styrktaraðila liðsins, Redbull.

„Sem atvinnumaður í rafíþróttum og meðlimur samfélagsins, sé ég einlæglega eftir þessu og biðst afsökunar á því að hafa svikið ykkur“ skrifaði Tanukana.

• Blogga um frétt