Sony hættir með PlayStation í Rússlandi

Sony hættir sölu á PlayStation í Rússlandi vegna stríðsins í Úkraínu og lokar á aðrar þjónustur.

Japanska tölvuleikjafyrirtækið lokar sölu á bæði vél- og hugbúnaði í Rússlandi vegna átakanna og hafa því íbúar Rússlands ekki heldur aðgang að vefverslun PlayStation.

„Sony Interactive Entertainment (SIE) gengur til liðs við alþjóðlegt samfélag við að kalla á eftir friði í Úkraínu,“ sagði fyrirtækið um málið.

Bitnar á rússneskum leikmönnum

Lokun Sony á PlayStation þjónustu mun líklega hafa víðtækar afleiðingar fyrir leikmenn í Rússlandi. 

Í færslu á rússnesku vefsíðunni Overclockers.ru er lýst hvernig nú berast fregnir af rússneskum leikmönnum sem lenda í vandræðum með að fá aðgang að núverandi leikjum sínum eða PlayStation viðmótinu síðan SIE lokaði aðgangi að þjónustu sinni í landinu.

Verða við bón Fedorov

Mörg önnur tölvuleikjafyrirtæki hafa einnig stöðvað starfsemi í Rússlandi eftir að aðstoðar forsætisráðherra Úkraínu, Mykhailo Fedorov, bað um það.

Pólska fyrirtækið CD Projekt hætti nýlega allri sölu í Rússlandi og Hvíta-Rússlandi. EA hefur einnig fjarlægt öll rússnesk íþróttafélög og íþróttamenn úr leikjum sínum. Microsoft hefur einnig lokað á þjónustu sína við Rússland og stöðvað nýlegar sölur.

Frétt af mbl.is

Rússnesk lið tekin úr umferð

Fyrirtæki um heim allan

Tölvuleikjafyrirtæki eru ekki einu fyrirtækin sem neita að stunda viðskipti við Rússland vegna innrásarinnar í Úkraínu.

Meðal fyrirtækja sem hafa taka þátt í að útiloka þjónustu við Rússland eru m.a. Intel, Nvidia, Apple, McDonalds, Starbucks, Coca-Cola, PepsiCo, Ikea, H&M, Nike, Mercedez Benz og fleiri.

• Blogga um frétt