Snoop Dogg hættir í stjórn rafíþróttaliðs

Tónlistamaðurinn Snoop Dogg er ekki lengur í stjórn rafíþróttaliðsins FaZe Clan.

Það kemur mörgum á óvart að Snoop Dogg sé tengdur rafíþróttasenunni en hann gekk til liðs við FaZe Clan eftir að hafa gert garðinn frægan á streymisveitunni Twitch, þar sem hann spilaði tölvuleiki fyrir framan þúsundir áhorfenda.

Hægt er að spila sem Snoop Dogg í Call of Duty: Vanguard og Warzone. Grafík/Activision Blizzard

FaZe Clan hefur ekki gefið upp hvers vegna Snoop Dogg sé hættur hjá liðinu en margir velta fyrir sér hvort ákvörðun hafi verið tekin í ljósi fjárhagsvandræða félagsins.

Erfiðir tímar

Mörg rafíþróttalið hafa undanfarið leitað fjármagns eftir erfið ár og þurfa aðstoð við að fjármagna næstu starfsár. Í ágúst 2022 kostaði hlutur í félaginu um 2700 krónur en nú er hluturinn á 68 krónur. 

Snoop Dogg þarf þó ekki að örvænta en tækifæri hans í tölvuleikjasenunni eru mörg en hann var talsmaður Call of Duty: Vanguard og Warzone um tíð og kom einnig fram í Call of Duty: Mobile leiknum um síðustu jól. 

• Blogga um frétt