„Þetta var frekar tæpt sko,“ segir Filip Kosta um 1. sætið sem þeir Tómas Hrafn Gunnars­­son, fé­lagi hans úr Breiða­bliki, náðu í tví­­liða­­leik í Fortni­te í flokki 8-12 ára.

Strákarnir kepptu báða dagana á ung­menna­mótinu sem haldið var í Arena um helgina og eru sammála um að mikið stuð hafi verið á mótinu og mjög gaman þótt taugarnar hafi verið orðnar þandar undir það síðasta. „Maður verður ógeðslega stressaður þegar þetta er orðið tæpt,“ segir Filip og Tómas tekur heils hugar undir.

Allt hafðist þetta líka hjá þeim á endanum og Filip segir aðspurður að þeir séu býsna góðir saman. Þeir séu samstilltir og þekki vel inn á spilamennsku hvor annars.

Þegar félagarnir eru spurðir út í nánustu framtíðaráform stendur heldur ekki á svörum. Þeir ætla að halda áfram að æfa saman, verða enn betri í Fortnite og að sjálfsögðu halda áfram að keppa saman.

Filip segist vera búinn að æfa í eitthvað í kringum tvö ár með Breiðabliki og hann hélt heiðri síns félags svo sannarlega á lofti á mótinu þar sem hann stóð einnig uppi sem sigurvegari í einliðaleik í sama aldursflokki í Fortnite.

Filip og Tómas voru mættir hressir á æfingu strax eftir góða helgi á Ungmennamótinu. Ljósmynd/RSÍ

Hann staðfestir síðan afdráttarlaust, kannski eins og við mátti búast, að Fortnite er aðalleikurinn hans en nefnir þó einnig Rocket League sérstaklega. „Þannig að ég keppti bara í Fortnite en ég spila sko alveg svaka marga aðra leiki,“ heldur Filip áfram og Tómas skýtur inn í: „Sama hér.“

En hvað er það við Fortnite sem gerir hann svona skemmtilegan?

„Bara hvernig maður getur byggt og þannig og líka hvað það eru margir að spila leikinn. Svo er skemmtilegt að keppa á mótum.“

Er samt ekki svolítið erfitt að byggja í leiknum?

„Kannski stundum en maður getur sleppt því. Maður þarf ekki endilega að byggja en stundum verður maður eiginlega að gera það.“

Filip segist aðspurður fylgjast með keppninni í Fortnite í ELKO-Deildinni og hann væri alveg til í að keppa þar. „Já, ég hef bara ekki haft tíma til að keppa í henni.“

Strákarnir benda síðan á að þetta snúist um miklu meira en bara að spila tölvuleiki því mikið líf og félagsskapur séu í kringum æfingarnar og rafíþróttirnar þar sem þeir geti líka kynnst öðrum krökkum.

„Það er til dæmis einn sem æfir í FH sem ég hitti þegar við kepptum á móti og við erum búnir að spila frekar oft saman,“ segir Filip.

Tengdar fréttir

Rafíþróttir á Íslandi

Danskt ofur­efli í Jön­köping

• Stelpurnar okkar klárar í slaginn
• Þórsarar réttu úr kútnum
• Ljóngrimmt net­skák­fólk
• Öruggir sigrar í net­skákinni

» Fleiri tengdar fréttir

• Blogga um frétt