Íþróttir | Rafíþróttir | mbl | 30.10.2024 | 9:31 | Uppfært 12:11

Spennan í Ljósleiðaradeildinni gæti varla verið meiri

Saga og Höttur tókust á í lokaumferð Ljósleiðaradeildarinnar í Counter Strike á þriðjudagskvöld.

Níunda og síðasta umferð Ljósleiðaradeildarinnar í Counter Strike hófst með leikjum Sögu og Hattar annars vegar og Rafík og Kano hins vegar.

Tómas Jóhannsson og Einar Ragnarsson lýstu leik Sögu og Hattar í beinni útsendingu en fyrir umferðina voru liðin í fjórða og fimmta sæti og því var talsvert í húfi hjá báðum.

Einar benti á að spennan í Ljósleiðaradeildinni gæti varla verið meiri en hún er við upphaf 9. umferðar, bæði í sambandi við umspilið og hvaða lið muni enda í efsta sæti að hefðbundnu tímabili loknu.

Sögu tókst, með nokkru harðfylgi, að vinna báða leikina 13:7 og landaði 2:0-sigri sem kom liðinu í 4. sæti með 12 stig en Höttur er, eins og leikar standa, í 6. sæti með átta stig. Hinn leikur gærkvöldsins fór síðan þannig að Rafík tapaði 1:2 fyrir Kano.

Sameiginleg niðurstaða Einars Ragnarssonar og Tómasar Jóhannssonar var að spennan í Ljósleiðaradeildinni gæti varla verið meiri við upphaf síðustu umferðar.

Lokaumferðin klárast síðan með þremur leikjum á fimmtudagskvöld þar sem Þór og Dusty, Veca og ÍA og Venus og Ármann mætast á spennuþrungnu herkkjavökukvöldi.

Þar verður viðureign toppliðanna Dusty og Þórs óumdeilt aðalleikurinn en úrslit hans munu í raun skera úr um hvernig og hvaða lið munu raðast í þrjú efstu sæti deildarinnar.