Íþróttir | Rafíþróttir | mbl | 1.11.2024 | 11:06 | Uppfært 11:45

Læti í leiknum sem beðið var eftir

Stefán Ingi Guðjónsson (StebbiC0C0), og Dusty þurftu að sætta sig við 2:0-tap gegn Ásmundi Viggóssyni (PANDAZ) og félögum í Þór sem tróna á toppi Ljósleiðaradeildarinnar fyrir úrslitakeppnina.

Leikurinn sem beðið hefur verið eftir, viðureign Þórs og Dusty, fór fram á fimmtudagskvöld og þegar 9. og síðasta umferð Ljósleiðaradeildarinnar er að baki liggur fyrir að Þór, Dusty og Veca eru í þremur efstu sætunum fyrir úrslitakeppnina sem hefst í næstu viku.

„Þetta er leikurinn sem við erum búnir að bíða eftir allt tímabilið,“ sagði Einar Ragnarsson við Tómas Jóhannsson fyrir leikinn sem þeir lýstu í beinni útsendingu. „Þetta er leikurinn sem við vissum einhvern veginn svona fyrir fram að væri sá sem myndi ráða úrslitum.“

Engu logið þar og vissulega mikið undir í þessum leik því úrslit hans réðu í raun hvaða lið myndu raðast í þrjú efstu sæti Ljósleiðaradeildarinnar.

Frétt af mbl.is

Þór byrjar með látum

Dusty tefldi fram örlítið breyttu og öflugu liði sem dugði þó ekki til því Þórsarar voru í banastuði og stóðu uppi sem sigurvegarar 2:0. Þór fer því upp í úrslitakeppnina á toppi deildarinnar. Dusty er síðan í öðru sæti og Veca í því þriðja.

Hinir tveir leikirnir í þessum lokahnykk fóru þannig að Veca sigraði ÍA 2:0 og Ármann lagði Venus 2:1 og því ljóst að Höttur, Rafík, Venus og ÍA hafa lokið keppni en Saga, Ármann og Kano elta efstu liðin þrjú í undanúrslitakeppnina sem hefst þriðjudaginn 5. nóvember.