Rafíþróttaár unga fólksins
Þórarinn Þórarinsson
Setja bókamerki
Barnamálaráðherra í Fortnite-stuði, landshornaflakk framhaldsskólabikars og fjölmennog spennandi ungmennamót koma við sögu í öðrum hluta fréttaannáls Rafíþróttasambands Íslands sem setti mikinn kraft og metnað í æskulýðsstarf sitt á árinu sem er að líða.
Fjölmenn, fjörug og spennandi ungmennamót Rafíþróttasambandsins settu heldur betur svip á árið sem er að líða enda heilbrigð og uppbyggileg nálgun barna og unglinga á tölvuleiki sem íþrótt þungmiðjan í starfsemi RÍSÍ.
Engum blöðum er heldur um það að fletta að þarna er RÍSÍ bæði að bregðast við brýnni þörf og svara mikilli eftirspurn þar sem um 70% íslenskra barna spila tölvuleiki.
Þetta kom fram í svörum foreldra í könnun sem Gallup gerði fyrir Rafíþróttasambandið á tölvuleikjaspilun hjá fullorðnum og börnum og greint var frá í október.
Niðurstöður könnunarinnar benda til þess að 73% stúlkna og 99% drengja á grunnskólaaldri spili tölvuleiki. Ef marka má könnunina spilar drjúgur meirihluti íslenskra barna undir 18 ára einhvers konar tölvuleiki en 68,6% svöruðu spurningunni: „Spilar barnið þitt tölvuleiki?“ játandi en 31,4% sögðu börn sín ekki spila tölvuleiki.
Síminn er algengasta leikjatæki barnanna en 45,5% sögðu börn sín spila tölvuleiki í símanum. Leikjatölvur koma þar á eftir með 35,6% og 21,3% spila í spjaldtölvum en fæst spila börnin í borð- eða fartölvum, 16,6%.
Ópólitískt Fortnite-fjör
Ásmundur Einar Daðason, þáverandi ráðherra mennta- barna - og íþróttamála, lék á als oddi í byrjun nóvember þegar hann gaf sér tíma í miðri kosningabaráttu til þess að líta við á síðasta ungmennamót RÍSÍ.
„Það gefur manni bara orku að hitta svona marga krakka,“ sagði Ásmundur Einar í Next Level Gaming í Egilshöll áður en hann afhenti sigurvegurum í Fortnite í flokki 8-12 ára verðlaun fyrir þrjú efstu sætin í ein- og tvíliðaleik.
Ráðherrann taldi réttast að hlífa krökkunum við dæmigerðum ræðuhöldum stjórnmálamanna og keyrði léttleikandi upp stemninguna í salnum og á keppendum mátti greinilega sjá að þeim leiddist ekkert að taka við verðlaunum úr hendi ráðherra.
/frimg/1/52/67/1526746.jpg)
Ásmundur Einar lýsti einnig mikilli ánægju með starf Rafíþróttasambandsins og þann öra vöxt sem verið hefur í uppbyggingu skipulagðs rafíþróttastarfs á undanförnum árum. „Þetta er alveg geggjað og það hefur verið gaman að fylgjast með öllu þessu starfi, uppbyggingunni og fá að taka þátt í henni.“
Auk ungmennastarfsins nefndi Ásmundur meðal annars sérstaklega þau tækifæri sem eru að opnast íslensku rafíþróttafólki í alþjóðlegum deildum, þann mikla ávinning sem stór alþjóðleg mót hafa þegar skilað og að byrjað sé að horfa til Íslands sem ákveðinnar fyrirmydnar þegar skipulagt rafíþróttastarf er annars vegar.
„Það er svo mikil gróska í þessu og gaman að því hversu hratt þetta þróast og nú er horft til okkar erlendis þegar kemur að skipulagðri starfsemi.“
Jökull Jóhannsson, framkvæmdastjóri Rafíþróttasambandsins, notaði tækifærið til að þakka ráðherranum fyrir þann áhuga og stuðning sem hann hefur sýnt starfi sambandsins í orði og á borði.
Hann sagði Ásmund Einar hafa reynst rafíþróttum haukur í horni í ráðherratíð sinni og að Framsóknarfólk virðist almennt mjög áfram um eflingu skipulagðs rafíþróttastarfs á Íslandi.
„Ungmennamótin eru einn mikilvægasti þátturinn í starfi Rafíþróttasambandsins þar sem allt miðar að heilbrigðri og uppbyggilegri nálgun á tölvuleiki,“ sagði Jökull jafnframt þegar hann þakkaði ráðherranum fyrir innlitið.
Íslandsmeistaramót grunnskólanema í rafíþróttum var í raun fyrsta ungmennamót ársins og var haldið helgina 27.-28. apríl þegar keppt var í Fortnite, Valorant, Minecraft og Fall Guys.
Fjörið var engu minna á fjölmennu ungmennamóti sem RÍSÍ hélt í Arena undir lok september þegar ríflega 130 börn á grunnskólaaldri mættu til að etja kappi í tölvuleikjunum vinsælu Fortnite, Valorant, Minecraft og Roblox.
Bikar fer á flakk
„Þetta var mikið fjör og rosalega skemmtilegt,“ sagði Atli Már Guðfinnsson, verkefnastjóri hjá RÍSÍ, um mótið. „Það var líf og fjör báða dagana. Mætingin var frábær og allt gekk þetta vonum framar þótt fjöldinn hérna hafi verið gríðarlegur þegar mest var.“
Framhaldskólanemar fengu einnig tækifæri til að láta ljós sitt skína á fyrri hluta ársins í FRÍS, rafíþróttakeppni íslenskra framhaldsskóla. Keppnin var fyrst haldin vorið 2021 þegar Tækniskólinn stóð uppi sem sigurvegari. Skólinn sigraði einnig á leikunum 2022 en þurfti nú að lúta í lægra haldi fyrir Fjölbrautaskóla Suðurlands í úrslitum þar sem att var kappi í Valorant, Counter-Strike og Rocket League.
Fjórtán skólar hafa að jafnaði tekið þátt í FRÍS á hverju ári en þeir voru ellefu á þessu ári þegar fulltrúar Fjölbrautaskóla Suðurlands voru krýndir nýir Framhaldsskólaleikameistarar.
Sprungan nú 1,2 km að lengd
Hraunið stefnir að gróðurhúsi ORF
Fólk fari eftir tilmælum: Mögulega stærri sviðsmynd
Byssumaðurinn í Grindavík var handtekinn
Beint: Eldgos á Reykjanesskaga
„Man ekki eftir að grjót hafi lent á bíl áður“
Enn sjást merki um hreyfingar en dregur úr aflögun
