Óvænt úrslit í upphafi netskákmótsins
Þórarinn Þórarinsson
Setja bókamerki
Sextán manna úrslit netskákmótsins Síminn Invitational hófust á sunnudagskvöld þegar þeir mættust annars vegar Helgi Ólafsson og Halldór Brynjar Halldórsson og Jóhann Hjartarson og Ingvar Þór Jóhannesson hins vegar.
Björn Ívar Karlsson lýsti viðureignum kvöldsins í beinni útsendingu í Sjónvarpi Símans og í streymi á veitum Rafíþróttasambandsins, eins og vera ber. Að þessu sinni hafði hann þó stórmeistarann Helga Áss Grétarsson til skrafs og greininga því, reglulegur félagi hans, FIDE meistarinn Ingvar Þór Jóhannesson, hrókeraði úr stöðu lýsanda og mætti stórmeistaranum Jóhanni Hjartarsyni sem keppandi í seinna einvígi kvöldsins.
Áður en að því kom áttust stórmeistarinn Helgi Ólafsson og Halldór Brynjar Halldórsson við. Helgi var í góðu formi í gærkvöld, tefldi af öryggi og nýtti öll mistök Halldórs og stóð uppi sem sigurvegari 4:0.
Helgi Áss spáði meiri spennu í einvígi Jóhanns og Ingvars og benti á að þótt gamla brýnið, Jóhann, væri betri skákmaður þá væri Ingvar glúrinn á netinu og betri skákmaður þar en yfir borðinu.
Úrslitin urðu síðan nokkuð óvænt en Ingvar sigraði einvígið með fjórum vinningum á móti tveimur hjá Jóhanni.
Eftir sigurinn tók Ingvar sér sína reglulegu stöðu í settinu hjá Birni Ívari í örstutt spjall um sigurinn sem hann sagði hafa komið honum sjálfum á óvart. Hann hafi átt von á að tapa gegn Jóhanni en að sama skapi hafi hann ef til vill mætt rólegri til leiks.
Ingvar Þór og Helgi Ólafsson eru þá komnir áfram í átta manna úrslit en keppnin heldur áfram á sunnudaginn, 26. janúar, þegar þrjú einvígi verða tefld en þá mætir landsliðskonan Hallgerður Helga Þorsteinsdóttir stórmeistaranum Braga Þorfinnssyni, stórmeistararnir Helgi Áss Grétarsson og Hannes Hlífar Stefánsson takast á og síðast en alls ekki síst alþjóðlegu meistararnir Aleksandr Domalchuk-Jonasson og Björn Þorfinnsson.
Vildu ekki viðurkenna að þarna væri snjóflóðahætta
140 þurfa að yfirgefa heimili sín
Íbúð í Grafarvogi illa farinn eftir eldsvoða
Fella ákvörðunina ekki úr gildi
Hugleiðir framboð til formanns
Fyrstu gíslunum sleppt úr haldi Hamas
Frekari rýming á Seyðisfirði
„Ekkert horft á þarfir samfélagsins“