Íþróttir | Formúla 1 | mbl | 15.11.2017 | 7:37 | Uppfært 17.11.2017 8:25

Ráða líklega Hartley og Gasly

Mynd 1 af 3 Liðsfélagarnir Pierre Gasly (t.v.) og Brendon Hartley í Mexíkó. AFP

Mynd 2 af 3 Nýsjálendingurinn Brendon Hartley hefur m.a. landað sigri í sólarhringskappakstrinum í Le Mans. AFP

Mynd 3 af 3 Pierre Gasly á heiðurshring ökumanna í Mexíkó. AFP

Búist er við að Toro Rosso tilkynni nú í vikunni um ráðningu þeirra Pierres Gasly og Brendons Hartley sem ökumanna liðsins á næsta ári, 2018.

Eftir ýmsar skákanir á yfirstandandi vertíð og brotthvarf þeirra tveggja sem hófu keppnistíðina fyrir liðið virðist það niðurstaðan að ráða þá Gasly og Hartley. Þeir óku bílum liðsins fyrst saman í Mexíkókappakstrinum.

Hyggst Toro Rosso stokka talsvert upp í starfsemi sinni með tilkomu nýs vélarframleiðanda, Honda.

Þrátt fyrir ungan aldur og stuttan keppnisferil hafa báðir ökumennirnir unnið til ágætra afreka. Hartley var í sigurliði Porsche í sólarhringskappakstrinum í Le Mans í Frakklandi ásamt því að hafa unnið titil ökumanna í þolkappakstri (WEC) tvö ár í röð.

Gasly hefur einnig safnað merkum verðlaunum en hann varð til að mynda heimsmeistari í GP2-formúlunni, í fyrra.