Íþróttir | Formúla 1 | mbl | 23.7.2018 | 9:58 | Uppfært 10:19

Hamilton heldur sigrinum

Mynd 1 af 4 Lewis Hamilton fagnar sigrinum einstaka í Hockenheim. AFP

Mynd 2 af 4 Lewis Hamilton á Mercedes ekur fyrstur yfir marklínuna í Hockenheim. AFP

Mynd 3 af 4 Lewis Hamilton tekur af sér sjálfu eftir sigurinn í þýska kappakstrinum í Hockenheim. AFP

Mynd 4 af 4 Lewis Hamilton (t.v.) þakkar liðsfélaga sínum Valtteri Bottas að láta honum efir sigurinn. Er Bottas lagði til atlögu við Hamilton fékk hann samstundis fyrirmæli af stjórnborði liðsins um að láta slíkt ógert. AFP

Eftirlitsdómarar þýska kappakstursins kölluðu Lewis Hamilton á teppið til að útskýra hvers vegna hann ók út úr aðrein bílskúranna út í brautina aftur.

Hamilton slapp með áminningu og heldur því fyrsta sætinu sem hann vann svo óvænt eftir að hafa byrjað keppni í 14. sæti vegna bilunar í tímatökunni. Lítils háttar rigning varð honum til happs en miklu frekar þó óhapp Sebastians Vettel á Ferrari sem féll úr leik vegna akstursmistaka er rúmur fimmtungur vegalengdarinnar var eftir. Var Vettel þá með örugga níu sekúndna forskot á næsta bíl.

Óhappið varð til þess að öryggisbíll var kallaður út í brautina og nær samstundis fékk Hamilton misvísandi fyrirmæli frá stjórnborði McLaren. Fyrir bragðið ók hann inn í bílskúrareinina í þeirri trú að ný dekk skyldu sett undir bílinn. En á leið inn að bílskúrunum skaust hann yfir grasbala og aftur inn í brautina. Var það lykillinn að sigri hans.

Hamilton og Mercedes var stefnt fyrir dómara kappakstursins að verðlaunaafhendingu lokinni vegna meints brots á keppnisreglum Alþjóða akstursíþróttasambandsins (FIA). Þótti sigur hans í uppnámi ef til akstursvítis kæmi þar sem hann kom í mark 4,5 sekúndum á undan liðsfélaga sínum Valtteri Bottas.

Að loknum löngum fundi og yfirsetu ákváðu eftirlitsdómararnir að refsingin skyldi takmarkast við áminningu, hina fyrstu sem Hamilton hlýtur á keppnistíðinni.

„Það er klárlega ljóst að keppnisreglur voru brotnar er ökumaðurinn ók yfir línurnar sem aðskilja keppnisbrautina og aðrein bílskúrareinarinnar,“ segir í niðurstöðum dómaranna sem segjast hafa ákveðið að taka tillit til ringulreiðar innan liðsins á því augnabliki sem brotið var framið. Þá hafi brotið átt sér stað meðan öryggisbíll var í brautinni og öðrum keppendum engin hætta búin af atvikinu.