Heimsmeistarinn vann í Ástralíu

Hollendingurinn Max Verstappen hjá Red Bull hrósaði sigri í kappakstrinum í Melbourne í Ástralíu í Formúlu 1 í dag.

Verstappen, sem er ríkjandi heimsmeistari í Formúlu 1, skákaði Lewis Hamilton hjá Mercedes og Fernando Alonso hjá Aston Martin í æsispennandi en nokkuð umdeildum kappakstri.

Í kjölfar áreksturs var öryggisbíll sendur út á keppnisbrautina þegar aðeins tveir hringir voru eftir.

Metið var sem svo að Carlos Sainz hjá Ferrari hafi verið valdur að árekstrinum þegar bifreið hans fór utan í bifreið Alonso og fékk hann fyrir vikið fimm sekúndna refsingu. Með því færðist Sainz úr fjórða sæti niður í það tólfta.

Bifreið Alonso hringsnerist vegna árekstursins og missti hann stöðu sína um stund en gerði afar vel í að vinna sig upp að nýju og ná þriðja sætinu.

Er Sainz ræddi við blaðamenn eftir keppnina var hann hundóánægður með refsinguna sem hann hlaut og taldi hana allt of harkalega.

• Blogga um frétt