Mercedes nýtti sér árekstur Verstappen

Árekstur fremstu tveggja manna í Formúlu 1 kappakstrinum í Austurríki í dag skilaði George Russell á Mercedes bíl sigrinum. Max Verstappen og Lando Norris rákust á.

Norris virtist vera að taka fyrsta sætið af Verstappen en Hollendingurinn hægði óeðlilega á sér í framúraksturstilraun Bretans með þeim afleiðingum að báðir bílar þurftu að fara inn á viðgerðarsvæðið með sprungin dekk.

George Russell fékk því fyrsta sætið afhent á silfurfati með níu hringi eftir af kappakstrinum og sigldi sigrinum heim fyrir Mercedes liðið. Carlos Sainz á Ferrari varð annar og Oscar Piastri á McLaren þriðji.

Lewis Hamilton varð fjórði og Verstappen fimmti þrátt fyrir að hafa fengið tíu sekúndna refsingu fyrir að valda árekstrinum við Norris.

• Blogga um frétt