Sölvi góður í sigurleik Djurgården

Sölvi Geir Ottesen fékk mjög góða dóma fyrir leik sinn með Djurgården þegar liðið sigraði Malmö, 1:0, í ausandi rigningu á heimavelli sínum í sænsku úrvalsdeildinni í knattspyrnu. Sölvi lék allan leikinn í stöðu hægri bakvarðar og hann átti stóran þátt í sigurmarkinu. Skalla hans var bjargað af marklínu en félagi Sölva, Jones Kusi Asare, náði frákastinu og skoraði sigurmarkið á 69. mínútu leiksins.

Sigurður Jónsson, þjálfari Djurgården, var ánægður með sigur sinna manna en með sigrinum tyllti Djurgården sér á toppinn þegar keppni í deildinni er hálfnuð. Liðið hélt þó ekki toppsætinu nema í einn sólarhring því Halmstad tók forystuna með sigri á Örebro í gær. Halmstad hefur 24 stig, Djurgården 23 og meistararnir í Elfsborg hafa 22.

"Nú þurfum við bara að endurtaka leikinn þegar við mætum Malmö eftir tíu daga," sagði Sigurður í samtali við sænska fjölmiðla eftir leikinn en Djurgården sækir Malmö heim í fyrsta leik sínum í seinni umferðinni.

"Þetta var enginn glansleikur af okkar hálfu en ég verð að hrósa leikmönnum mínum fyrir mikla baráttu. Við höfum átt í erfiðleikum að undanförnu þar sem margir leikmenn hafa verið meiddir en þeir eru óðum að snúa til baka eftir þau," sagði Sigurður, sem tók við þjálfun Djurgården fyrir tímabilið.