Úrúgvæski sóknarmaðurinn Diego Forlán gæti orðið samherji markvarðarins Ingvars Jónssonar hjá norska úrvalsdeildarliðinu Sandefjord.
Norskir fjölmiðlar greina frá því að Sandefjord vinni í því að reyna að fá Forlán til að leika með liðinu fram til haustins en liðið í er 11. sæti í norsku deildinni.
Forlán, sem er 38 ára gamall, hefur víða komið við á ferli sínum. Hann hefur meðal annars leiki með Manchester United, Villareal, Atlético Madrid og Inter Mílanó. Síðast lék með liði Mumbai City í indversku ofurdeildinni í fyrra en hann gerði þriggja mánaða samning við félagið í fyrra.
Forlán lék 112 leiki með úrúgvæska landsliðinu en hann lék sinn síðasta leik með því árið 2014. Hann skoraði 36 mörk með landsliðinu. Á HM 2010 var hann útnefndur besti leikmaður mótsins og varð markahæstur með 5 mörk ásamt þremur öðrum leikmönnum.