Læknisskoðun landsliðsmannsins Kolbeins Sigþórssonar, leikmanns franska knattspyrnuliðsins Nantes í Frakklandi, gekk nokkuð vel og hefur hann þegar hafist handa við næsta skref í endurhæfingarferli sínu og mun því verða sjáanlegri í herbúðum Nantes á næstunni.
Kolbeinn er að jafna sig eftir alvarleg hnémeiðsli sem hafa haldið honum frá knattspyrnuvellinum frá því í ágúst 2016 en Kolbeinn er samningsbundinn franska liðinu til ársins 2020.
Kolbeinn er ekki enn tilbúinn til þess að snúa aftur á æfingar með liðsfélögum sínum en hinn ítalski Claudio Ranieri, knattspyrnustjóri Kolbeins, segist vonast til þess að landsliðsmaðurinn komist á ný í form. Þetta kemur fram í frönskum miðlum í dag - m.a. fanska stórblaðinu L’Equipe.
Ranieri ræddi við fréttamenn í dag og talaði um stöðuna á Kolbeini.
„Hann hefur mikla reynslu. Ég vona að hann komist í stand. Ef hann vill berjast fyrir okkur standa honum allar dyr opnar,” er haft eftir Ranieri á heimasíðu L’Equipe.
„Hann er góður skotmaður og er góður í loftinu. Ef hann er reiðubúinn til þess að svitna og vinna sér inn stöðuna í liðinu þá stend ég með því,” sagði Ranieri.
Ekki kom fram hvenær búist er við því að Kolbeinn verði klár í slaginn en hann vonast til þess að verða í landsliðshópnum sem fer á HM í Rússlandi næsta sumar.
Nantes birti einnig í dag myndir af kappanum á æfingu og sjást þær hér að neðan.
🔙🏃🏼
— FC Nantes (@FCNantes) January 19, 2018
🇮🇸 @KSigthorsson pic.twitter.com/nwWi0IqtAe