Juan Carlos Osorio hefur ákveðið að hætta sem landsliðsþjálfari Mexíkó í knattspyrnu eftir að hafa hafnað nýjum samningi knattspyrnusambandsins þar í landi.
Osorio tók við Mexíkó í nóvember 2015 og kom liðinu á heimsmeistaramótið í Rússlandi nú í sumar þar sem það tapaði gegn Brasilíu í 16-liða úrslitum. Undir stjórn Osorio vann Mexíkó 33 leiki af 52 og hafa ekki margir þjálfarar liðsins á undanförnum áratugum náð svo góðu sigurhlutfalli.
Íslenska landsliðið varð að sætta sig við 3:0-tap gegn Mexíkó undir stjórn Osorio í vináttuleik í Santa Clara í Kaliforníu fyrr á árinu er bæði lið voru að undirbúa sig fyrir HM.