„Hvar eru apagrímurnar núna?“

„Ég var svo reiður að eftir að ég hafði skorað seinna jöfnunarmarkið hljóp ég til velsku landsliðsmannanna og hrópaði: „Hvar eru apagrímurnar núna helv... ykkar?“ Þetta sagði gamla kempan Ásgeir Sigurvinsson í viðtalið við Morgunblaðið í kjölfar þess að íslenska landsliðið vann það frábæra afrek að gera 2:2 jafntefli gegn Wales í undankeppni heimsmeistaramótsins 1982. Ásgeir var harðákveðinn í því að láta þá velsku fá fyrir ferðina fyrir meint grín þeirra á okkar kostnað.

Það hefur sennilega enginn farið varhluta af farsanum í kringum tyrkneska landsliðið í knattspyrnu undanfarinn sólarhring. Tyrknesku leikmennirnir voru óhressir með miklar tafir og langa öryggisleit í Leifsstöð og virtist facebookvefur Knattspyrnusambands Íslands varla ætla að standa af sér atlögu fokillra tyrkneskra netverja þegar ónefndur maður otaði uppþvottabursta í stað hljóðnema að fyrirliða Tyrkja í miðju viðtali.

Um annað hefur síðan ekki verið rætt. Tyrkneskir blaðamenn voru yfir sig hneykslaðir á því að ekki var töluð tyrkneska á blaðamannafundi íslenska landsliðsins í morgun og síðar í kvöld hellti Senol Gü­nes, landsliðsþjálfari Tyrkja, sér yfir Íslendinga og sagði gestrisnina vera þjóðinni til minnkunar! Tyrkir eru reiðir fyrir leikinn í undankeppni EM á morgun og sennilega harðákveðnir í að láta Íslendinga fá fyrir ferðina.

„Íslendingar verða hafðir að öpum“

Þegar Ísland heimsótti Wales í undankeppni HM 1982 fauk hressilega í leikmenn íslenska landsliðsins þegar tveir leikmenn Wales birtust í dagblaði þar í landi með apagrímur undir yfirskriftinni: „Íslendingar verða hafðir að öpum í Swansea.“

Hvort það hafi verið ætlunarverk velska blaðamannsins að reita Íslendinga til reiði fylgir ekki sögunni og sennilega var þetta ósköp saklaust, en þetta vakti gríðarlega reiði á Íslandi. Móðgunargjarnir Íslendingar mættu tvíefldir til leiks, náðu jafntefli og gerðu út um HM-vonir Wales!

Apagrímurnar sem gerðu Íslendinga illa á sínum tíma.

„Guðni [Kjartansson] landsliðsþjálfari dró upp dagblað og sýndi okkur. Í blaðinu var stór mynd af tveimur velskum landsliðmönnum, Micky Thomas og Carl Harris, með apagrímur og undir stóð: Við gerum íslendingana að öpum í kvöld,“ sagði hetja íslendinga þetta kvöldið, Ásgeir Sigurvinsson við Morgunblaðið þann 16. október 1981.

„Við urðum auðvitað öskureiðir, gamla góða Íslendingastoltið kom upp í okkur og við urðum staðráðnir í að láta þá éta þessi orð ofan í sig. Það má því segja að þessi fíflaskapur í þeim hafi átt einhvern þátt í því að Wales á nú litla möguleika á því að komast áfram í heimsmeistarakeppninni.“ Ásgeir, eins og kom fram að ofan, skoraði bæði mörk Íslands í frægu 2:2 jafntefli og þeir velsku fengu svo sannarlega að fá fyrir ferðina.

Það hefur komið á daginn að maðurinn með uppþvottaburstann var alls ekkert Íslendingur og þá hefur Isavia fullyrt að öryggisleitin ógurlega hafi einfaldlega verið samkvæmt reglum og í raun mun styttri en Tyrkir halda fram. Það skyldi þó engu að síður aldrei fara svo Emre Belözoglu, fyrirliði Tyrkja, geri út um EM-vonir okkar á Laugardalsvellinum annað kvöld og hlaupi til Íslendinganna öskrandi: „Hvar eru uppþvottaburstarnir núna helv... ykkar?“

Munu Tyrkir eiga síðasta orðið? AFP

• Blogga um frétt