Bayern München vann 6:1-stórsigur á Werder Bremen á heimavelli er liðin mættust í þýsku 1. deildinni í fótbolta í dag. Philippe Coutinho, Robert Lewandowski og Thomas Müller skoruðu allir tvennu fyrir Bayern.
Það byrjaði ekki bærilega fyrir meistarana því Milot Rashica kom Werder Bremen yfir á 24. mínútu. Bayern svaraði með tveimur mörkum fyrir hlé og það héldu Bæjurum engin bönd í seinni hálfleik.
Dortmund átti ekki í miklum erfiðleikum með að leggja Mainz af velli á útivelli, 4:0. Marco Reus, Jadon Sancho, Thorgan Hazard og Nico Shulz skoruðu mörk Dortmund.
Toppbaráttan í þýsku deildinni er æsispennandi, en Dortmund er í þriðja sæti deildarinnar með 29 stig og Bayern í sætinu fyrir neðan með 27 stig.
Borussia Mönchengladbach er í toppsætinu með 31 stig og Leipzig í öðru sæti með 30 stig, en Mönchengladbach og Leipzig eiga leiki til góða.