Starfsumhverfi afreksíþróttanna þungt

Guðni Bergsson, formaður Knattspyrnusambands Íslands, segir starfsumhverfi afreksíþrótta strembið, nú þegar fyrirtæki eru að minnka stuðning við íþróttir auk þess sem launakostnaður leikmanna sé mögulega hærri en æskilegt er.

Í samtali í Morgunblaðinu í dag ítrekar Guðni mikilvægi þess að rekstrarumhverfi knattspyrnufélaga sé heilbrigt. Víða sé barna- og unglingastarfið rekið sérstaklega með æfingagjöldum iðkenda ásamt frístundastyrkjum sveitarfélaga og utanaðkomandi stuðningi eftir atvikum.

„Við verðum að vinna saman að því að rekstur félaga verði sjálfbær og starfsumhverfið heilbrigt. Við megum ekki gleyma því að fótboltinn skilar miklu til samfélagsins,“ segir hann.