Ramos setti magnað met í sigrinum á Úkraínu

Sergio Ramos skráði sig í sögu­bæk­urn­ar í gær­kvöld þegar hann skoraði tvö mörk í sigri Spán­verja, 4:0, gegn Úkraínu í Þjóðadeild­inni í fót­bolta.

Ramos hef­ur þar með skorað flest mörk allra varn­ar­manna í lands­leikja­sög­unni en hann er bú­inn að skora 23 mörk í 171 lands­leik fyr­ir Spán­verja.

Gamla metið átti arg­entínski varn­ar­maður­inn Daniel Passar­ella sem skoraði 22 mörk fyr­ir Arg­entínu á átt­unda og ní­unda ára­tug síðustu ald­ar.

Marka­skorið hjá Ramos er magnað en hann leik­ur ávallt sem varn­ar­maður. Hann hef­ur skorað 100 mörk fyr­ir fé­lagslið sín, 97 fyr­ir Real Madrid og þrjú fyr­ir Sevilla. Af þeim 123 mörk­um sem hann hef­ur skorað fyr­ir landslið og fé­lagslið eru aðeins 27 mörk úr víta­spyrn­um.

„Ég var með þetta met í sigt­inu og ætlaði mér að fara fram úr Passar­ella, svo ég er afar ánægður,“ sagði Ramos við Marca.

Þetta er ekki eina metið sem þessi 34 ára gamli varn­ar­maður á því eng­inn leikmaður hef­ur verið oft­ar rek­inn af velli í sögu spænska fót­bolt­ans, en hann hef­ur fengið rauða spjaldið 26 sinn­um á ferl­in­um.

• Blogga um frétt