Grét yfir meðferðinni hjá Barcelona

Úrúg­væski knatt­spyrnumaður­inn Luis Su­árez seg­ir að hann hafi oft brostið í grát síðustu vik­urn­ar sem hann dvaldi hjá katalónska knatt­spyrnu­fé­lag­inu Barcelona vegna þeirr­ar meðferðar sem hann hafi þurft að sæta.

„Þetta var erfiður tími og ég grét stund­um yfir því sem ég gekk í gegn­um. Fé­lagið til­kynnti mér að það væri að reyna að leita að lausn í mín­um mál­um og það fór ekki vel í mig. Það sem særði mig mest var hvernig staðið var að mál­un­um, ekki það að hver og einn verður ávallt að sætta sig við að góðir hlut­ir taki ein­hvern tíma enda,“ sagði Su­árez við fréttamiðil úr­úg­væska knatt­spyrnu­sam­bands­ins eft­ir að hafa skorað í sig­ur­leik gegn Síle, 2:1, í undan­keppni HM í nótt.

Su­árez skoraði 198 mörk fyr­ir fé­lagið á sex árum og er þriðji marka­hæsti leikmaður­inn í sögu þess. Hann varð fjór­um sinn­um spænsk­ur meist­ari, bikar­meist­ari, og varð Evr­ópu­meist­ari með liðinu árið 2015. Su­árez átti eitt ár eft­ir af samn­ingi sín­um við fé­lagið en er nú horf­inn á brott, án greiðslu, og far­inn að spila með Atlético Madrid.

Ronald Koem­an, nýr knatt­spyrn­u­stjóri Barcelona, til­kynnti Su­árez að hann væri ekki í sín­um framtíðar­plön­um og í kjöl­farið var hann sett­ur út úr æf­inga­hóp liðsins fyr­ir þrjá æf­inga­leiki á und­ir­bún­ings­tíma­bil­inu.

„Það vita ekki all­ir hvað gerðist en það erfiðasta var að mæta á æf­ingu og vera send­ur í ein­hvern allt ann­an hóp því ég mátti ekki spila æf­inga­leik­ina. Kon­an mín sagði að hún sæi vel hve óham­ingju­sam­ur ég væri, hún vildi sjá mig brosa á ný, og þegar mér bauðst að ganga til liðs við Atlético hikaði ég hvergi,“ sagði Su­árez sem kom inná sem varamaður og skoraði tvö mörk í fyrsta leik sín­um, 6:1-sigri á Gran­ada.

Li­o­nel Messi, fyr­irliði Barcelona, steig fram og gagn­rýndi fé­lagið fyr­ir meðferðina á Su­árez.

„Ég er ekki hissa á því að Messi skyldi styðja mig op­in­ber­lega því við þekkj­umst svo vel. Hann vissi hvers kon­ar ang­ist ég væri að ganga í gegn­um og að ég væri sár yfir því hvernig mér væri sparkað á dyr. Þeir stóðu ekki rétt að mín­um mál­um og Leo veit hvernig mér og minni fjöl­skyldu leið,“ sagði Luis Su­árez.

• Blogga um frétt