UEFA krefst þess að áhorfendur verði leyfðir

UEFA hefur sett fram skýlausa kröfu til allra 12 landanna sem munu halda EM 2020 í knattspyrnu í sumar um að leyfa áhorfendur á öllum leikjum mótsins.

„Það eru nokkrar mismunandi sviðsmyndir, en möguleikinn á að spila leiki á EM án áhorfenda er ekki lengur til staðar. Allar hýsingarborgir verða að ábyrgjast að áhorfendur verði leyfðir á leikina sem fara þar fram,“ sagði Aleksander Ceferin, forseti UEFA, í samtali við Sky Sports í dag.

Hve margir áhorfendur koma til með að geta farið á hvern leik mun fara eftir sóttvarnarreglum hvers lands, en nú er það ljóst að UEFA muni halda uppi kröfu um tiltekinn lágmarksfjölda áhorfenda, ellegar eigi tiltekin lönd og leikvangar í þeim löndum á hættu á að missa leiki.

• Blogga um frétt