Hættir eftir þrjú góð ár

Diego Martínez, knattspyrnustjóri spænska félagsins Granada, hefur sagt starfi sínu lausu eftir þrjú árangursrík ár.

Martínez tók við liðinu sumarið 2018 og leiddi liðið upp úr spænsku B-deildinni með því að lenda í öðru sæti á sínu fyrsta tímabili við stjórnvölinn.

Tímabilið á eftir var Granada spútnik-lið spænsku 1. deildarinnar þegar það endaði í 7. sæti og tryggði sér þar með sæti í Evrópukeppni, Evrópudeildinni, í fyrsta sinn í sögu félagsins.

Þar komst liðið alla leið í átta liða úrslit keppninnar, þar sem liðið sló til að mynda ítalska stórliðið Napoli út í 32-liða úrslitum. Í átta liða úrslitum mætti liðið ofjarli sínum, Manchester United, sem fór alla leið í úrslitaleik Evrópudeildarinnar.

Í spænsku 1. deildinni á nýafstöðnu tímabili endaði liðið í 9. sæti.

Forsvarsmenn Granada reyndu allt hvað þeir gátu til þess að reyna að sannfæra Martínez um að stýra liðinu áfram en Martínez var ekki haggað; hann vill nýja áskorun.

• Blogga um frétt