Sakar ráðherrann um sýndarmennsku

Tyrone Mings, leikmaður enska karlalandsliðsins í knattspyrnu og Aston Villa, hefur sent innanríkisráðherra Bretlands, Priti Patel, tóninn í kjölfarið á kynþáttaníðinu sem margir leikmanna Englands hafa orðið fyrir eftir ósigurinn gegn Ítölum í úrslitaleik EM í gærkvöld.

Patel fordæmdi níðið harðlega í yfirlýsingu og sagði á engan hátt hægt að þola slíkt og kvaðst vonast til þess að lögregluyfirvöld gætu komið böndum á þá seku. En Mings benti á í færslu á Twitter að sjálf hefði Patel gagnrýnt ensku landsliðsmennina fyrir að krjúpa á kné fyrir leikina og mótmæla á þann hátt kynþáttaníði.

„Þú afgreiddir okkar skilaboð gegn kynþáttaníði sem sýndarmennsku og svo þykistu vera hneyksluð þegar það sem við erum að berjast gegn á sér stað í raun og veru," skrifaði Mings á Twitter.

• Blogga um frétt